Meginreglan er að auglýsa skuli öll laus störf, bæði embætti og önnur störf. Umsóknarfrestur um auglýst störf skal a.m.k. vera 2 vikur frá birtingu auglýsingar. Fullnægjandi birting auglýsingar getur verið með tvennum hætti.

  1. Annars vegar með því að birta auglýsingu á starfatorgi ríkisins ásamt tilvísun til hennar í yfirlitsauglýsingu sem birt er í dagblaði sem gefið er út á landsvísu.
  2. Hins vegar með því að birta auglýsingu í dagblaði sem gefið er út á landsvísu.

Störf sem eru undanþegin auglýsingaskyldu eru störf sem eru til skemmri tíma en 2 mánaða, störf sem eru vegna afleysinga innan við 12 mánuði eða störf sem auglýst hafa verið innan síðustu sex mánaða og í þeirri auglýsingu hafi þess verið getið að umsóknin geti gilt í sex mánuði.

Ekki er skylt að auglýsa starf laust til umsóknar þegar starfi tiltekins starfsmanns er breytt t.d. í tilefni af nýju skipulagi.

35. gr. Auglýsing

  • Laus störf háskólakennara og þeirra sem eru ráðnir til vísinda- og fræðistarfa eru auglýst á starfatorgi fjármálaráðuneytis.
  • Að jafnaði skal starf auglýst þannig að umsóknarfrestur sé fjórar vikur frá birtingu auglýsingar.

Til þess að tryggja að háskólinn eigi völ á sem hæfustum starfskröftum skal auglýsa laus störf á alþjóðlegum vettvangi og í innlendum dagblöðum eftir því sem ástæða er til. Starfsmannasvið skal annast allar auglýsingar bæði á innlendum og erlendum vettvangi.

Allar upplýsingar um laus störf hjá háskólanum skulu vera aðgengilegar á háskólavefnum

36. gr. Undantekningar frá auglýsingaskyldu

Ekki er skylt að auglýsa starf, ef um er að ræða tímabundna ráðningu til afleysinga til tólf mánaða eða skemur, eða ef um er að ræða hlutastarf, þannig að starfið telst ekki vera aðalstarf í skilningi laga um réttindi og skyldur starfsmanna ríkisins. Ef ráðið er til afleysinga til tólf mánaða eða skemur er ekki heimilt að framlengja ráðninguna án auglýsingar í samræmi við reglur þessar.

  • Starf er ekki auglýst þegar um er að ræða framgang eða tilflutning á milli starfsheita samkvæmt ákvæðum laga um opinbera háskóla eða reglna þessara, sbr. 38.- 39. gr.
  • Starf er ekki auglýst þegar rektor býður akademískum starfsmanni, samkvæmt tillögu fræðasviðs og með samþykki háskólaráðs í samræmi við 2. mgr. 17. gr. laga nr. 85/2008, um opinbera háskóla, að taka við akademísku starfi  við skólann.

Þá er heimilt að undanþiggja auglýsingu störf sem byggja á sérstökum tímabundnum styrkjum, störf sem tengjast sérstökum tímabundnum verkefnum, störf sem nemendur gegna við háskólann samhliða rannsóknatengdu framhaldsnámi og störf við háskólann sem tengjast tilteknu starfi utan hans á grundvelli samstarfssamnings, sbr. 2. mgr. 30. gr. reglna þessara.

Óheimilt er að taka ákvörðun um ráðningu í starf við Háskóla Íslands á grundvelli undanþágu frá auglýsingaskyldu skv. 4. mgr. nema öll eftirfarandi atriði eigi við:

  1. Starfið er á vettvangi háskóladeildar eða stofnunar, sem skilgreint hafi það með tilliti til meginreglna um hæfniskröfur og starfsskyldur.
  2. Starfið er tímabundið og lengst til fimm ára eða til tveggja ára ef um framlengingu á tímabundinni ráðningu er að ræða, sbr. 31. gr.
  3. Að fjárhagslegur grundvöllur starfsins sé tryggður og starfsaðstaða sem það krefst.
  4. Fyrir liggi að fræðasvið, deild eða stofnun hafi rökstudda ástæðu fyrir því að undanþiggja starfið auglýsingu, sbr. 4. mgr.
  5. Fyrir liggi hæfnisdómur dómnefndar þegar í hlut á starf prófessors, dósents, lektors, sérfræðings, fræðimanns eða vísindamanns.

Frá og með gildistöku laga nr. 70/1996 eru starfsmenn ríkisins annað tveggja ráðnir sem embættismenn eða almennir starfsmenn.

  • Starfsmenn aðrir en embættismenn, skulu ráðnir með ótímabundinni ráðningu með 3 mánaða gagnkvæmum uppsagnarfresti.
  • Heimilt er að ráða starfsmenn tímabundið. Tímabundin ráðning skal þó aldrei standa lengur en 2 ár samfellt (41. gr. l. nr. 70/1996).

Starfsmenn ríkisins eru almennt ráðnir með eftirfarandi hætti:

  • Skipun í starf
  • Setningu (tímabundinni skipun í starf)
  • Ótímabundinni ráðningu með gagnkvæmum uppsagnarrétti
  • Tímabundinni ráðningu með gagnkvæmum uppsagnarrétti

Ráðningarsamningur er það samkomulag nefnt sem launamaður og atvinnurekandi gera sín á milli, þegar sá síðarnefndi ræður starfsmann til sín til að starfa fyrir sig undir sinni stjórn og á sína ábyrgð gegn umsömdum kjörum, m.a. launagreiðslum og réttindum.

Um þetta réttarsamband gildir meðal annars:

  • Að kjör skv. ráðningarsamningi mega aldrei vera lakari en samið er um fyrir slíkt starf/störf af stéttarfélögum í kjarasamningum, sbr. 24. gr. l. nr. 94/1986 og 1. gr. l. nr. 55/1980.
  • Að ráðningarsamningur getur bæði verið skriflegur og munnlegur og oft er hluti ráðningasamnings (yfirborgun) munnlegur. Munnlegir ráðningarsamningar gilda til jafns á við skriflega (gagnstætt almennu reglunni um kjarasamninga) ef unnt er að sanna efni þeirra.
  • Að ráðningarsamningar ríkisstarfsmanna skulu vera skriflegir frá og með gildistöku laga nr. 7071996, sbr. 42. gr. þeirra.
  • Að ráðningarsamningar geta bæði verið tímabundnir og ótímabundnir.
Share